დღეს, 25 მაისს, World Vision საქართველოსა და დაავადებათა კონტროლის და საზოგადოებრივი ჯანმრთელობის ეროვნულ ცენტრს (NCDC) შორის გაფორმდა ურთიერთთანამშრომლობის მემორანდუმი, რომელიც გრძელვადიანი თანამშრომლობის ფარგლებში მიზნად ისახავს საქართველოში იმუნიზაციასა და COVID-19 ვაქცინაციასთან დაკავშირებით ცნობიერების ამაღლებისა და საინფორმაციო-საგანმანათლებლო ღონისძიებების მხარდაჭერას.
მემორანდუმს ხელო მოაწერეს World Vision საქართველოს დირექტორმა - ეკატერინე გურგენაძემ და დაავადებათა კონტროლის და საზოგადოებრივი ჯანმრთელობის ეროვნული ცენტრის (NCDC) გენერალური დირექტორის მოადგილემ მეცნიერების დარგში - პაატა იმნაძემ. ხელმოწერის დასრულებისთანავე ჩატარდა სამუშაო შეხვედრა, სადაც ორივე მხარის წარმომადგენლებმა დეტალურად განიხილეს დოკუმენტით გათვალისწინებული ერთობლივი ინიციატივები და ღონისძიებები.
მემორანდუმის ფარგლებში დაგეგმილია ზოგადი და სკოლამდელი განათლების დაწესებულებების წარმომადგენლებისათვის - მასწავლებლებისთვის, აღმზრდელებისა და სფეროს სხვა წარმომადგენლებისთვის, აგრეთვე პირველადი ჯანდაცვის ობიექტების სამედიცინო პერსონალისათვის საგანმანათლებლო შეხვედრების ორგანიზება საქართველოს სხვადასხვა მუნიციპალიტეტებში; ასევე, ვაქცინაციის მნიშვნელობის შესახებ სხვადასხვა სახის საინფორმაციო - საგანმანათლებლო მასალების შემუშავება და გავრცელება როგორც სასკოლი, ისე სკოლამდელი დაწესებულებებისთვის.
საგანმანათლებლო შეხვედრებს გაუძღვებიან დაავადებათა კონტროლის და საზოგადოებრივი ჯანმრთელობის ეროვნული ცენტრის წამყვანი სპეციალისტები, რომლებიც შეხვედრის მონაწილეებს მიაწვდიან უახლეს ინფორმაციას მსოფლიოში COVID-19 პანდემიის მიმდინარეობისა და COVID-19-ის საწინააღმდეგო ვაქცინაციის დანერგვის მსოფლიო გამოცდილების შესახებ; ასევე ისაუბრეს ვაქცინაციის მნიშვნელობასა და მის როლზე კოვიდის პანდემიის შეჩერებაში; ვაქცინაციასთან დაკავშირებულ გამოწვევები და კოვიდ-ვაქცინების მიმღებლობის შესახებ როგორც საქართველოში ასევე მთელი მსოფლიოს მასშტაბით.
2021 წლის ევროპის იმუნიზაციის კვირეულის ფარგლებში World Vision საქართველომ მხარი დაუჭირა დაავადებათა კონტროლის და საზოგადოებრივი ჯანმრთელობის ეროვნულ ცენტრს იმუნიზაციისა და COVID-19 ვაქცინაციის მნიშვნელობის შესახებ ცნობიერების ამაღლების მიმართულებით და უკვე ჩაატარა საგანმანათლებლო შეხვედრები კახეთსა და იმერეთში. მიმდინარე წელს, World Vision საქართველოს ფინანსური მხარდაჭერით საგანმანათლებლო შეხვედრები საქართველოს სხვა სამიზნე მუნიციპალიტეტებშიც ჩატარდება.
{{reset.message}}